الرئيسية / غير مصنف / ازاي تستفيد من مكتبة السفارة الأمريكية ف مصر !؟

ازاي تستفيد من مكتبة السفارة الأمريكية ف مصر !؟

ازاي تستفيد من مكتبة السفارة الأمريكية ف مصر !؟
======================

1- لو بتتعلم انجليزي وحابب تطبق عملي :

كل يوم أربع السفارة بتعمل محادثات مع ناس أمريكيين عن مواضيع مختلفة وأي حد يقدر يحضرها ببلاش بس بشرطين هنقولهم ف الآخر.

2- ف الأيام العادية تقدر تروح وتعمل محادثة برضوا مع ناس مصريين بس هتلاقي فيهم ناس جامدين جدا.

3- زهقت من الكنبة والبلكونة والسرير ولعب البلايستيشن وحابب تتفرج ع افلام اجنبي بترجمة انجليزي وسماعات عالية آخر حاجة وتليفزيون الفرق بينه وبين السينما ملم (اللي هو مللي )
هتروح تلاقي الناس هناك عندها افلام اجنبي طازة وشاشات عالية تنين وسماعات وكدزة، وللأسف كمان ببلاش

4- عمرك ما لعبت ع الاكس بوكس وطول عمرك تسمع عنه بس، هتلاقيه هناك 😀 وببلاش برضوا .

5- عندك بحث وعايز نت سريع ، الناس هناك جايبين وصلة نت سريعة جدا ( تقريباً شادين سلك من أمريكا) وشوية أجهزة apple على قدهم كدة و على فكرة… ببلاش برضوا

6- بما أن الناس هنا في تعداد المثقفين وممكن كتير يكون بيدور على كتب أدب انجليزي أو تاريخ أو اجتماع أو تنمية أو أي حاجة دة كله هناك ببلاش، لا وايه،،، كل الكتب اصلية.

7- فاضي ومش وراك أي حاجة وعايز تلعب شوية انت واخوك أو انتي واختك ومش حابين الاكس بوكس، هتلاقي هناك طن العاب ذكاء وحروف متقاطعة وشوية العاب معرفش حتى اسمها، وكله بالانجليزي.

8- عايز تسمع محادثات انجليزي بهاند فري وجهاز audio book مليان محادثات مختلفة، هتلاقيه هناك.

9- طيب ليك ف جو الايفينتس والمحاضرات والاجتماعات والبتنجانات، هتلاقيه هناك، محاضرات عن مختلف المواضيع من تعليم ف الخارج ومنح وووووو.

خد الكبيرة بقآ :

تقدر تستعير كتاب التحضير للتوفل TOEFL
اللي هو مش عارف بكام 100 جنيه ومعاه الاسطوانة بتاعته كمان 😉

#أسئلة شائعة بعد البوست ده 😀

>> هي المواعيد بتاعتها امتة؟
كل يوم من الأحد للخميس من 10 ص : 4 م

>> هو في شروط عشان أدخل ! ؟
* أيوة

– اول حاجة يكون معاك البطاقة الشخصية مش مكسورة أو منتهية أو يكون معاك باسبور.

– ميكونش معاك أي شيء اليكتروني غير الفون اللي هتسيبه هو والهاند فري ع البوابة برة قبل ما تدخل، غير كدة بقى سواء فلاشة، شاحن، لاب، اي بود، أي حاجة حتى لو قصافة ظوافر مش هتدخل بيها.

>> طب لو نسيت وجبت معايا فلاشة أو أي حاجة من الممنوع ده !؟

أولا لو قلبت شامبانزي إفريقي خليك متأكد ان الأمن مش هيدخلك، بس هتلاقي قدام السفارة بتديله الحاجة وهياخد فلوس لحد ما تخرج، وخلي بالك الفلاشة ب 5 جنيه عشان هيقولك عشرة، قوله انا داخل المكتبة .

>> ايه هي شروط المحادثة اللي انت قلت عليها فوق! ؟

– شرطين ، أولهم : انك تكون عامل كارنيه عضوية في المكتبة بتاعة السفارة،،، ازاي ؟؟؟ عادي بتروح أي يوم قبل الساعة 12 وتقول للريسيبشن عايز اعمل كارنيه، هيقوم مصورك وتستلم الكارنيه ف نفس اليوم.

تاني شرط انك تكون حاجز المحادثة عن طريق الميل، ودي سهلة، انت اول ما تدخل قول للريسيبشن عايز اعرف شروط المحادثة هيديك ورقة فيها كل حاجة.

>> ينفع استعير كتب أو أسطوانات افلام أو كتاب صوتى!؟

ايوة

بس لمدة أسبوع ، وممكن تجدد أسبوع كمان عن طريق الميل أو رقم الأرضي بتاع المكتبة، هتلاقيه ف ورقة الارشادات هناك.
طب لو نفضت بعد المدة !! اليوم الزيادة ب خمسة جنيه تقريباً 😀

>> يعني اول ما اروح اعمل ايه بقى !؟

بص يا صديقي هتسال ع البوابة عايز أدخل المكتبة
تمام ( IRC ( information resources center ,
عجبك فلم ناس مشغلاه وفي مكان جنبهم، شدلك كرسي وسماعة من ع الترابيزة واتفرج، عايز تلعب أدخل العب، عايز كمبيوتر، الجهاز الفاضي اشتغل عليه 3:)
انطلق يعني 😀

استنى استنى انت عرفت العنوان فين !؟

أقرب مكان ليها محطة مترو السادات ،، أنزل وقول عايز اروح السفارة الأمريكية

عن sara kamal

شاهد أيضاً

5 كتب مهمه جدا لتعلم الانجليزيه. حملهم مجانا

مجموعة من الكتب المفيدة لتعلم اللغة الإنجليزية : 1- The English Language from sound to …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *