الرئيسية / مقالات / خطوات لازم تعملها عشان تحمي حسابك على الفيسبوك من الحذف او التهكير
خطوات لازم تعملها عشان تحمي حسابك عل الفيسبوك من الحذف او التهكير
خطوات لازم تعملها عشان تحمي حسابك عل الفيسبوك من الحذف او التهكير

خطوات لازم تعملها عشان تحمي حسابك على الفيسبوك من الحذف او التهكير

الفيسبوك بدأ حملة لفلترة كل الأكونتات عليه، إمبارح بعتلي رسالة بيطلب مني صورة فيها تفاصيل واضحة لوشي، وبعد كده خرجني من الأكونت إجباريًا لحد ما يراجع الصورة، بالتالي ممكن تصحى تلاقي الأكونت بتاعك اللي عليه كل ذكرياتك وصورك ومشاركاتك مع أصحابك اتحذف بشكل نهائي، علشان كده هتكلم بالتفصيل إزاي تقدر تحمي حسابك تمامًا من الحذف أو التهكير، الكلام اللي جاي ده مهم جدًا ركز معايا:
.
-قبل ما نتكلم في أي حاجة لازم تعرف إنك فرد واحد بس من ضمن 2 مليار أكونت على الموقع وفقًا لآخر إحصائية على الموقع، فالفيسبوك بيتعامل معانا حرفيًا بسياسة بناقص واحد، ممكن جدًا يقفل أكونتك المهم بالنسبالك من غير ما يتأثر هو بأي حاجة.
.
كل غرض الفيسبوك إنه يتأكد من إنك شخص حقيقي وعندك أكونت واحد بس، علشان كده اسمك لازم يكون حقيقي ومقيد في مستند رسمي، خليه زي البطاقة أو جواز السفر بالظبط. علشان لو الأكونت اتقفل تقدر تسترده.
.
– الاسم على الفيسبوك لازم يكون خالي من الألقاب، بلاش (Dr) و (Eng) وأي لقب قبل اسمك، عارف إن في أكونتات كده لكن مع مرورالوقت هييجي عليها الدور والفيسبوك هيكتشفها ويرفض الاسم ده.
.
– الاسم مينفعش يكون مكتوب بلغتين مختلفتين، ولا يكون في أسامي غير بشرية، صديقة اسمها عصفورة الفيسبوك قفلها الأكونت أكتر من مرة علشان الأستاذ مارك مقتنع إن عصفورة ده اسم طير ومينفعش يكون اسم واحدة D رغم إنه اسمها الحقيقي.
.
– لو اسمك على الفيسبوك Ana aslan wad mo3geza أو Ana aslan bent mozaa اقفل الأكونت خالص ومتقعدش على الفيسبوك تاني.
.
– الباسورد مهم جدا وكتير بنكسل نغيره أو بنختار أرقام سهلة، الباس بتاعك لازم يكون مُعقد، في طريقة لطيفة لاختيار باسورد معقد ميتنسيش لحسابك، وهي إنك تحط أول حروف من جملة عجبتك أو من أغنيتك المفضلة ومعاهم رقمك المفضل، وبكده عمرك ما هتنساه ومحدش غيرك هيعرفه.
حاول تحط صورة بروفايل شخصية ليك لو أمكن، ولو لا، اتصور مع أصحابك وخليهم يعملولك تاج في الصور، وحاول تكتب مجال دراستك ومكان عملك حتى لو هتخليهم only me.
.
– الصور العارية حتى لو في الرسائل الخاصة الفيسبوك بيعتبرها سبام وممكن يحذف الأكونت أو يعطله بسببها، خلي بالك يا خلبوص “)
.
– في خاصية كويسة جدا لازم تعملها اسمها الأسماء الموثوقة (trusted contacts) وفيها بتختار 3 من أصدقائك الموثوقين لو الأكونت بتاعك اتقفل تقدر تستعين بيهم وترجعه تاني، هتخش على الضبط، وتختار تاني اختيار (security & login) وبعدها (setting extra security) واختار من 3 ل 5 أصدقاء.
.
– أهم خطوة لحماية الأكون من الهاكر هي ربط الدخول على حسابك برقم موبايلك، هتختار الخيار اللي قبل الأسماء الموثوقة، وتحط رقم موبايلك والفيس هيرفض يفتح أكونك من متصفح غريب حتى لو كتب الباسورد غير لما يبعتلك كود على الموبايل الشخصي بتاعك. لازم تفعل الخاصية دي.
.
آخر خطوة هتعملها هتخش على الضبط واضغط تاني خيار، واخرج من كل الأجهزة اللي فاتحة الأكونت بتاعك. واللي غالبًا هي أجهزتك أنت بس، لكن لزيادة الاطمئنان.
.
أخيرًا دي شوية نصايح سريعة:
في أكونتات عليها آلاف المتابعين واتقفلت نهائي، وأنا شخصيًا اتحذفلي 3 بوستات منهم بوست فيه كتب عن علم النفس، وحجتهم إن فيها روابط مخالفة، ففعليا الفيسبوك ملوش عزيز.
كمان في لخبطة جامدة بعد موضوع التدخل الروسي المحتمل في الانتخابات الأمريكية، وإلغاء حيادية الإنترنت، الموضع بجد المرة دي وممكن يأثر مش بس على الفيسبوك بل على كل المواقع التانية.
فخد بالك وحاول تأمن نفسك وحساباتك على الفيسبوك تحديدًا من خلال الخطوات اللي فاتت وعلى مواقع التواصل كلها من كل الجوانب وقبل فوات الأوان.

——————————————-

شكرا

Mostafa Gomaa

عن sara kamal

شاهد أيضاً

'طريقه مجربه وناجحه جدا لتحسن مستواك في اللغة الإنجليزية

‘طريقه مجربه وناجحه جدا لتحسن مستواك في اللغة الإنجليزية

‘طريقه مجربه وناجحه جدا  لتحسن مستواك في اللغة الإنجليزية من خلال قراءة روايات (عربي & …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *