الرئيسية / المنح الدراسية / الدليل التاريخي للهجره والشغل برا مصر
الدليل التاريخي للهجره والشغل برا مصر
الدليل التاريخي للهجره والشغل برا مصر

الدليل التاريخي للهجره والشغل برا مصر

#كنز_عن_الهجرة والدارسة فى الخارج

أزاي تهاجر مهما كان وضعك ف مصر ؟؟

اولا ” الطلاب ”
=========================
لو انت طالب سواء ثانويه او ف الجامعه ليك طريق واحد بس وهو هجره الدراسه

ودي انك بتروح تدرس عدد سنين معينه سواء ماجستير او بكالريوس في دوله معينه وبعد ما تخلص بتجيب عقد عمل في تخصصك وتتحول اقامه الطالب لاقامه عمل

الدراسه برا مصر نوعين .. بالفلوس علي حسابك .. او بالمنح علي حسابهم

المنح :
========

عشان تعرف تلاقي منحه لازم يتوفر فيك 3 اشياء :

انجلش كويس سواء تويفل او سات او ايلتس + تقديرات عالية + انشطه طلابيه تطوعيه مع مؤسسات تطوعيه وقياديه ..

ساعتها هتدور علي منح في تخصصك سواء جزئية أو كلية وهيبقي مسموحلك تشتغل عدد ساعات معينة في الاسبوع ( 21 ساعه غالبا ف معظم البلاد )

وبعد ما تخلص دراسه ومعادلة تقدر بسهوله تجيب عقد عمل في تخصصك.
ودي مواقع تقدر تدور من خلالها على منحة مناسبة لتخصصك.
https://goo.gl/6CTuKS
https://goo.gl/2KdkYG
https://goo.gl/BtYN4o
طبعا في مواقع تانية غير أنك تقدر تدور بنفسك على جوجل.

.

الدراسه بفلوس علي حسابك :
========================
في نوعين من الدراسه ع حسابك

1- دراسه علي حسابك في دول سهله الدخول ومستوي تعليم فوق المتوسط زي اوكرانيا – ماليزيا – روسيا
وفي الحاله دي مصاريف الدراسه بتوازي نفس مصاريف الجامعات الخاصه في مصر

بتجيب قبول جامعي من اي جامعه في اي دوله هناك وبتدفع مصاريف الدراسه وبتروح تدرس

وبرضو هيبقي مسموحلك تشتغل عدد ساعات معينة في الاسبوع ( 21 ساعه غالبا ف معظم البلاد )
وبعد ما تخلص دراسه ومعادلة تقدر بسهوله تجيب عقد عمل في تخصصك.

.

2- الدراسه علي حسابك في دول صعبه ومستوي تعليم عالي جدا جدا :

ودي محتاجه مصاريف كتير جدا عشان تقدر تحصل علي فيزا دراسه لدوله كبيرة زي امريكا وكندا والمانيا
.

المانيا ارخص البلاد النضيفه اللي تقدر تدرس فيها
بيكون مطلوب منك مستوي b1 او b2 في الالماني + 8600 يورو في حساب مقفول هناك
او يكون معاك ضامن الماني يضمنك ويدفعلك فلوس الدراسه هو كل سنه

.

امريكا معظم الناس بتروح مش بيدرسوا في جامعات لكن بيروحوا يدرسوا في حاجه اسمها كلية المجتمع او community college ودي هي هي نفس نظام الجامعات بس الاختلاف في ان الكلية بتديك واحد من تلت انواع من الشهادات :

يا شهادة بعد سنه وتقدر تشتغل بيها ف امريكا
يا شهادة بعد سنتين او تلاته ودي بتكون درجه علميه اعلي من الشهادة ام سنه واحدة بس
يا شهادة بعد 4 سنين ودة مبيكونش اكاديمك بيكون براكتيكال اكثر

ومعظم الناس بتختار community college عشان ارخص من الجامعات وبتنجز في وقت اقل ( اسهل كوبري للدراسه ف امريكا من الاخر )
.

طب اخد الفيزا بتاعه الدراسه للبلاد الكبيرة دي ازاي ؟؟؟

في الحالة دي ما عليك الا انك تختار الدولة اللي بتفكر تدرس فيها وهتلاقي لها موقع رسمي لكل الجامعات

(مثال https://goo.gl/dsg5js الخاص بالدراسة في ألمانيا و https://goo.gl/cqmHnv الخاص بالسويد).

هتدخل على الموقع وتختار التخصص والدرجة العلمية وهتلاقي كل البرامج المتاحة بكل التفاصيل والمصاريف والرسوم بعد ما تختار البرنامج اللي يناسب ويناسب تخصصك ويناسب امكانياتك الماديه و اللغويه .. تروح و تبدأ بمراسلة الجامعة مباشرة عشان تحصل علي قبول جامعي وامشي في خطوات التقديم في السفارات ..

.

ثانيا : هجره التخصصات الكبيرة والعماله المهره لدول المهجر فقط :
==================================

لو انت شخص معاك فلوس و عندك تخصص كبير و سنين خبره في مجالك هتقدم علي هجرة كندا او استراليا او نيوزيلاندا.

والهجره في ال 3 بلاد دول بنظام النقط .. عامل زي الجمعيه .. بتجمع نقط علي نقط علي نقط علي نقط عشان تجيب اعلي نقط وتسافر

نقاط علي المؤهل + نقاط علي سنين الخبره + نقاط علي اللغه + نقاط علي الزوجه لو متزوج ولو وصلت للحد الادني من النقط اللي تسمحلك تقدم علي الهجره هتقدم ويختاروك

و بتروح هناك تاخد اقامه دائمه وبعد عدد سنين معينه تقدر تقدم علي الجنسيه

المواقع دي هتلاقي فيها كل اللي هتحتاجه عن التقديم للهجرة :

كندا : https://goo.gl/A28yYz
استراليا : https://goo.gl/ozc6kR
نيوزيلاندا :https://goo.gl/27PmLv

وبالنسبة للـ 3 بلاد دول كونهم من أكتر بلاد العالم استقبالا للمهاجرين هتلاقي فيديوهات وقنوات كاملة على يوتيوب بتتكلم عن الهجرة بالتفصيل خطوة بخطوة،

و متنساش تبص على منتدى المطاريد أو منتدي المهاجرون العرب وتسأل الناس اللي سافرت عن تجاربها ده هيوفر عليك وقت ومجهود وفلوس كتير جدا.

.

ثالثا : هجره المستثمرين ( صغار المستثمرين مش ابو هشيمه ولا ساويرس )
====================================

هتقدم علي فيزا استثمار او شراء عقار وتاخد أقامه في دول كتير حسب امكانياتك وقوانين البلد دي

ومن ضمن البلاد اللي بتسمح بفيزا عن طريق شراء عقار هي جورجيا، تركيا، قبرص وغيرهم بتكاليف متفاوتة.
.

أما الدول اللي بتسمح بالاقامة عن طريق الاستثمار فهي أكتر من اننا نعدها لكن خلينا نتكلم عن الاتحاد الاوروبي (لأن باقي الدول بتطلب مبالغ خرافية) فأسهل دولتين تقدر تاخد فيهم اقامة مستثمر هم اسبانيا وسلوفاكيا .. فقط 9000 يورو ثمن الاستثمار هناك
.

الفيديو دة 14 دقيقه كامله بيتكلم عن كل التفاصيل من الالف للياء في هجره المستثمرين في سلوفاكيا
https://www.youtube.com/watch?v=VnqYVzea8jI

.

.

رابعا : هجره الباحثين عن العمل من الشباب الخريجيين :
================================
لو انت خلصت كليه وخلصت جيش ومعاك تخصص معين انت شاطر فيه ومعاك انجلش كويس

قدامك كذا طريق

1- معاك انجلش كويس + skills عاليه اوي اوي علي الانترنت والتسويق الالكتروني = هتشتغل freelancer وتصرف علي سفرك.

وال freelance تقدر بشويه مجهود وشويتين ذكاء تصرف علي سفرك بسهوله جدا وممكن يجيلك عقود عمل من شركات عالميه تسافر ليها بس عايز سعي وتعب مفيش شئ بدون مقابل
.

2- تروح دوله زي الامارات بفيزا زياره شهر او 3 شهور بتطلعها من اي مكتب سياحه او تسافر علي طيران الامارات زي الاماراتيه وفلاي دبي والاتحاد والعربيه وهما بيطلعولك الفيزا بشرط تحجز معاهم ذهاب وعودة وتدفع تأمين مسترد لما ترجع

الفيزا غالبا ما بين 90 دولار ل 150 دولار .. دة الرينج بتاعها
.

ولما تروح هناك يأما تراسل الشركات هناك بالايميلات وال cv يأما تنزل تدور بنفسك علي رجلك وتبعت ال cv ( يدا ب يد ) وتدور علي شغل

ودول اكبر موقعين للشغل في الامارات تقدر تبحث عن عمل فيهم

1- https://www.bayt.com/ar/uae/

2- https://uae.dubizzle.com/ar/jobs/

ولما بتتوفق وبتحصل علي عمل بتعمل بدل مغادره وبتاخد اقامه هناك بالشغل بتاعك

.

في مكاتب طبعا بتجبلك عقود عمل لدول عربيه تانيه زي تساهيل اللي بيجبلك عقود عمل في السعوديه بس السعوديه لا ننصح بيها حاليا عشان الوضع زي الزفت هناك بعد فرض الرسوم علي المقيميين وعائلاتهم

.

خامسا : هجره العماله المهره بدون هجره النقط الاعتياديه :
================================

لو معاك خبره وتخصص سنين كبيرة جدا هتسافر بعقود عمل او فيزا عمل بسهوله لدول كتير وكله حسب تخصصك وعدد سنين خبرتك

والنوعية دي تندرج تحتها فئات كتير من السفر .. منها الرياضيين ومنها الحرفيين ومهن اخرى كتير.

1- من أشهر البلاد اللي ممكن تسافر فيها بالطريقة دي هي ألمانيا، والحكومة الألمانية عملت موقع مخصص للموضوع ده وهيساعدك على أنك تعرف الاجراءات بالتفصيل ومتوفر كمان باللغة العربية. https://goo.gl/WT5iL9

.

2- وفي نظام في النمسا اسمه Red White Red Card ودة بيتيح ليك انك تسافر النمسا بعقود مؤقته كذا سنه تشتغل هناك حسب تخصصك اللي انت متخصص فيه

وتقدر تشوف الموقع دة عشان تعرف كل الشروط والتفاصيل
http://www.migration.gv.at/…/permanent-immigration-red-whit…
.

3- ولو انت معاك فلوس لامتحانات المعادله تقدر تروح البلاد الكبيره بفيزا سياحه و تروح وتدور علي كورسات المعادلة في تخصصك وتعادل قبل انتهاء مدة التأشيرة وهتقدر بسهوله تبعت ال CV بتاعك من وانت هناك وتجيب عقد عمل بسهولة في تخصصك.
.

4- لو ليك شخص ايطالي الجنسيه تعرفه ف ايطاليا تقدر تسافر ب عقود العمل الموسمية لإيطاليا في شهر 3 من كل سنة ويشترط ان شخص ايطالي الجنسيه يقدملك بصورة الباسبور فقط
.

.

سادسا : هجره الناس الابيض مييييييييييييييييح معندهاش اي حاجه تقريبا
=========================================

1- لوترررررررررري امريكا : اشهر واسهل طريقه للهجره في العالم

ودي عباره عن قرعه عشوائيه بتتعمل كل سنه في شهر 10 والتقديم مجاااااااااااانا ايوة مجاااانا واللي بيكسب بياخد جرين كارد لامريكا يعني اقامه دائمه وبعد 5 سنين بيقدر يقدم ع الجنسيه

شروطها حاجتين بس : تكون مخلص ثانويه عامه او ما يعادلها .. وتتصور صوره شخصيه وترفعها ع الموقع والصورة ليها مواصفات خاصه وده الموقع الخاص بيهم عشان تشوف كل التفاصيل https://goo.gl/kwHL6F

2- اعزب / عازبه : هتتجوز او تتجوزي من واحد / واحدة اجنبي / اجنبيه..
.

3- متزوج او متزوجه : تقدر تخلف ابنك في البلاد الاتيه : البرازيل – امريكا – كندا – الارجنتين وابنك بيحصل علي جنسيه البلاد دي ودي بتساعدك بعدين انك تاخد انت و زوجتك اقامه دائمه في البلاد دي

وتقدر تشوف بوستاتي ع الجروب بخصوص موضوع الولادة في الدول الاجنبيه للحصول علي الجنسيه والاقامه .. اعمل سيرش بأسمي وهتلاقيها
.

4- الإقامة السياحية في تركيا سنتين او سنه بفيزا السياحة العادية بمبلغ 250 دولار وتدور علي شغل ولازم يكون معاك تركي كويس اوي اوي..

الاقامه اجراءاتها بسيطه وسهله بس لازم اول لما تروح هناك من تاني يوم مباشره تبدأ ف الاجراءات قبل ما تنتهي التأشيرة عشان انت عارف هي شهر واحد بس التأشيرة ف انجز نفسك عشان متتزنقش
.

5- النقطه دي انا عارف ومتأكد انها هتجيب ليا وجع القلب والمناهدة طول اليوم ومتأكد من مدعي االمثاليه هيرشقوا في النقطه دي عشان يبوظوا البوست بس برضو هقولها عشان ابقي خلصت ذمتي وقولت كل اللي اعرفه وضميري يبقي مرتاح ان كل معلوماتي قولتها

لو انتي بنت وخلاص هتشحتي ف مصر وهتترمي في الشارع .. سهل تقدمي لجوء في اي بلد برا مصر وتدعي انك هربانه من مصر من عمليه الختان و عشان اهلك عايزين يختنوكي وانتي مش موافقه
.

ودي بمحامي شاطر بتقدري تكسبي بسهوله قضيه اللجوء ( حصلت مع صديقه شخصيه قالت كدة ) بس كان معاها جيش من الفيمنست اللي خلوا قضيتها تتسمع عشان تثبت فعلا انها هربانه من الختان
.

طب انتي بنت ومتزوجه ومخلفه بنت وبرضو هتشحتوا ؟؟ المره دي هتقولي انك هربانه من اهل جوزك او من اهل ابوكي عشان عايزين يختنوا بنتك وانتي و زوجك خايفين علي حياتها من الختان بس برضو عايزة محامي شاطر وعايزة صرف كتير عشان المحامين هناك اجورهم نار

.

طب انتي بنت ومتزوجه ومخلفه ولد ؟؟ لا انتي كدة منحوسه ولعي في نفسك اسهل
.

عشان بس اريح دماغي من الصداع ف النقطه دي .. محدش بيجبرك تعملها ولا لأ .. احنا بندي كل الاختيارات للناس وهما يختاروا براحتهم .. يعملوا لجوء بقي .. يعملوا محشي .. يعملوا باميه مسبكه .. يعملوا واحد امبليه .. هما احرار انا مليش فيه ..

انا عندي معلومه قولتها وخلصنا .. امين ؟
.

ملحوظه مهمه جدا جدا

لازم تتعلم لغة اهل البلد اللي رايحها , أضعف الإيمان يكون معاك انجلش كويس اوي ومش كفايه كمان في بلاد زي ألمانيا وتركيا الخ الخ , مفيش لغه = مفيش نجاح.
اقعدوا بالعافيه
Traveller experience
#الباحث_عن_الحكمة

عن sara kamal

شاهد أيضاً

'طريقه مجربه وناجحه جدا لتحسن مستواك في اللغة الإنجليزية

‘طريقه مجربه وناجحه جدا لتحسن مستواك في اللغة الإنجليزية

‘طريقه مجربه وناجحه جدا  لتحسن مستواك في اللغة الإنجليزية من خلال قراءة روايات (عربي & …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *