القواعد الخمسه عشره للصحيان  بدري

لعلمك اللي بيصحوا بدري دول مش أشخاص خارقين ولا حاجة 
هم بس ممكن يكونوا بيتبعوا نظام حياة صحية وهكذا، اللي هو يصحوا بدري ويقوموا يتمشوا شوية الفجر مثلًا – أه والله بيصحوا يتمشوا – وبعدها بيرجعوا البيت ياخدوا دش كمان – شوف الجبروت يا أخي- ، وبعدها بيفطروا ويروحوا شغلهم عادي جدًا، زي ما إحنا بنصحى متأخر كده نلبس أي هدوم على الشماعة وننزل على الشغل علطول (في الوقت ده هم بيكونوا عملوا سبعتلاف حاجة مثلًا) 

بس خلاص (وداعًا للكسل) إحنا قررنا نبقى زيهم، وجيبناك أسرارهم وهنقولك كمان هم بيعملوا إيه عشان يبقى عندهم الباور ده، ركز معايا كده وهقولك تعمل إيه 

1 – نام بدري : لازم تنام قبل الميعاد اللي ناوي تصحى فيه بـ مش أقل من 8 ساعات، لو التزمت بالعادة دي هتلاقي نفسك اتعودت تصحى قبل ميعادك كمان، يعني مش يبقى ميعاد صحيانك الساعة 7 الصبح مثلًا وحضرتك تفضل قاعد في السرير بتلعب في الموبايل أو بتتأمل في السقف لحد الساعة 5 مثلًا !! ، ابقى قابلني لو صحيت 

2 – فكر في حاجة حلوة هتصحى عشانها : لازم تبدأ يومك بالحاجة اللي بتحبها، سواء بقى كانت ممارسة رياضة انت بتحبها، أو مثلًا تقرأ في كتاب بتحبه، أو مثلًا تفطر مع أسرتك (ده إذا لقيتهم صاحيين أصلًا، ولو مش صاحيين صحيهم عادي، ما انت أكيد مش هتتعذب بالصحيان بدري لوحدك)، أو ابعت مورنينج تيكست لحد بتحبه والعياذ بالله (ده إذا لقيته صاحي برضه) 

3 – قلل من شرب الشاي والقهوة : مينفعش تشرب أكتر من كوبين قهوة الصبح، لأن ده مع الوقت هيؤثر على قدرتك على النوم (هيسهرك) وبالتالي هتلف في نفس الدايرة (سهر فصحيان متأخر وهكذا..) ، وكل التأخير ده طبعًا بخصم فلوس، واخدلي بالك انت 

4 – اتمدد : أه والله اتمدد، يعني موضوع البص في السقف طول الليل ده أجله للصبح، أول ما تصحى كده متقومش من السرير علطول، نام على ضهرك كده شوية وبص في السقف وتأمل في أي حاجة (الله النجفة دي حلوة أوي إزاي مخدتش بالي منها قبل كده ! ، إيه ده الدولاب معووج من فوق إزاي النجار مخدش باله من ده ! ، على فكرة يا ماما السقف بدأ يقشر لازم نبيض) 
المهم تأمل في أي حاجة ملهاش فايدة وخلاص، التمدد مع التأمل ده هيديك طاقة مش طبيعية واسترخاء وصفاء ذهن رهيب، بس حذاري وانت متمدد كده تفكر في الديدلاين أو في مستقبلك مثلًا عشان ساعتها مش هتسترخي خالص وهيجيلك اكتئاب، ده لمصلحتك انت والله 

5 – نام بدري 

6 – اتنفس بعمق : بيقولوا إن التنفس بيساعد على التخلص من الطاقة السلبية، فانت حاول تاخد نفس عميق كده وتفكر في كل حاجة حلوة بتملكها في حياتك أو أي نجاحات حققتها (لو لقيت يعني) واحمد ربنا على كل حال 

7 – اشرب مياه : على فكرة لو عندك جفاف لازم هتحس إنك دايمًا تعبان ومجهد، الأبحاث بتقول كده، وبتقول كمان إن شرب المياه الصبح على معدة فاضية هيساعدك تنضف معدتك وقولونك من كل التراكمات والأكل بافترا اللي كلته قبلها بيوم، وبيقولوا كمان المياه بتدي طاقة (هم اللي بيقولوا)، فخلي جنبك في الشغل طول اليوم ازازة مياه، بس وقتها حاول بقدر الإمكان تنقل مكتبك جنب الحمام، اللهم بلغت 

8 – نام بدري 

9 – العب رياضة : الأبحاث بتقول إن الرياضة هتنظم روتينك اليومي، هتقولي إزاي بقى ؟! ، أقولك بص يا سيدي النظرية بتقول إنك لما تصحى الصبح بدري قبل شغلك تلعب رياضة وبعدها تطلع ع الشغل فلما تخلص شغلك وترجع بالليل هتكون خلاص اتعدمت العافية ومبقاش فيك أي نفس خلاص لعمل أي شيء تاني غير النوم، فبالتالي هتتقلب على السرير بدري بدري (وهذا هو المطلوب) 

10 – افطر حلو : أنا أعرف ناس بتقعد طول الليل تفكر ياترى هفطر إيه بكره الصبح، ده شيء غريب أه بس مفيد برضه عشان بيوفرلك وقت التفكير الصبح وبيخليك تصحى تدخل ع المطبخ علطول تحضر اللي انت قررت تحضره مسبقًا تك تك تك وتخلص، مش لسه هتقف تدور وتفكر الصبح، وطبعًا الفطار مهم جدًا عشان هيزود طاقتك طول اليوم. 
لو بقى صحيت لقيت تلاجتك فاضية ومفيهاش غير مياه يبقى اشرب مياه وانزل، وعربيات الفول مفيش أكتر منها، لأ متروحش مصمت لأ مش ع الصبح كده 

11 – استحمى الصبح : بالنسبة لأكثر الناس دي هتبقى الخطوة الأكتر صعوبة، لكن الأبحاث بتقول إن الاستحمام الصبح بيزود الطاقة وبينشط الدماغ وحاجات كتير كده حلوة، وكمان ليه فايدة عامة على البشرية بدل الروايح اللي أكيد كل الناس بتشمها في المترو والأوتوبيسات الصبح دي، ميصحش كده يعني، ده سلاح بيولوجي قاتل للبشرية 

12 – ارجع للقاعدة رقم 5 ، ده لمصلحتك انت والله 

13 – اظبط منبهك على صوت هادي أو موسيقى بتحبها : إنك تصحى على صوت بتحبه الصبح سواء كان موسيقى هادية أو قرآن أو صوت شخص بتحبه ده بيحفز مخك وبينشطه وكمان أكيد هيحسن مزاجك طول اليوم، على عكس ما تصحى مثلًا على صوت خناقة في الشارع عشان واحدة دلقت مياه على غسيل جارتها أو صوت الراجل اللي بينادي (بتاع الخزين يااا بصلللل) أو البياع بتاع (عسل صعيدي عسل بلاصي) لأن انت كده هيبقى يومك خلاص اتقفل قبل ما يبدأ 

14 – سيب الموبايل ده شوية : مينفعش يبقى يومك كله قاعد ملطوع على كل مواقع السوشيال ميديا، رساله هنا وبوست هنا وجروب رغي هنا، حاول تحدد لنفسك وقت يومي تدخل فيه تبص على النوتيفيكيشن وترد ع الرسايل وتعمل اللي عايز تعمله، وبعد الوقت ده يبقى خلاص سيب الموبايل، مش لازم كل نوتيفيكشناية تجيلك ع الموبايل تدخل تشوفها أو تصحى من نومك عشان تشوفها، صدقني النوتيفيكيشن مش هتدعي عليك لو مشوفتهاش ولا هتطلع تقتلك تقولك مشوفتنيش ليه، بس لما كل يوم تصحى متأخر وتروح شغلك متأخر المدير ممكن يقتلك، ولو المدير معملهاش أوعدك إن الخصم اللي هيتخصملك آخر الشهر كفيل يسببلك أزمة قلبية، ده إحنا بنتشعبط في رضا ربنا